「Elevator Elevator 心越急越煩問題越難拆 Come on」

人生最嘥時間就係等待,日日等唔同嘅嘢,等車等買演唱會飛等搭𨋢

你又邊估到等𨋢都可以成為一個遊戲。

搭𨋢打尖遊戲-電梯前!

 

電梯前 (In Front of the Elevators) 係來自日本嘅大熱桌遊~最近終於推出咗中文版!

 

先開為敬 開佢部𨋢

外盒細小,但入面裝住無窮樂趣

首先會見到嘅係一疊計分紙,

因為每次遊戲需要進行三個回合,所以第一鋪輸個馬鼻都唔緊要,絕對可以後來居上㗎

中文版《電梯前》好貼心咁提供咗4種語言嘅說明書:中文、英文、日文、法文

遊戲背景好簡單,就係一家人去百貨公司,但係好多人等𨋢,為咗要上樓shopping,必須要打尖入𨋢。遊戲目的就係將你嘅家族成員帶上去隊頭,送晒佢哋入𨋢!

玩遊戲之前,我哋一齊睇下有咩卡牌先。

 

遊戲可以2-4人進行,但卡牌就有5隻顏色,總共49張

家族牌5張(每隻顏色各1):2人遊戲每人2張,3/4人遊戲每人1張

家族牌係你所代表嘅顏色,卡上亦印咗打尖規矩俾大家參考

打尖規矩:特定角色可以打另一指定角色尖
例如你有男孩角色,而該𨋢排最後嘅係女孩,咁男孩就可以打尖排喺女孩前面喇

人物牌35張:


有5個顏色,每款顏色都有7個人物
2/4人局:用5種顏色隻行遊戲
3人局:用4種顏色隻行遊戲


角色:女孩、男孩、媽媽、爸爸、奶奶、爺爺、迷路小女孩

每張角色牌嘅上方都會講咗邊個人物可以打邊個嘅尖
例如女孩可以打男孩尖,男孩可以打媽媽尖,感覺有少少似玩鬥獸棋咁有既定嘅食物鏈

 

迷路小女孩?定係古惑小女孩?

 

每個顏色都都會有迷路小女孩,佢其實有個特別嘅功能!


如果使用咗迷路小女孩,同一條隊入面同小女孩同顏色嘅角色都要排喺佢後面


假如你係藍色玩家又抽到綠色小女孩,使用後綠色爸爸就要排小女孩後面
咁藍色媽媽就可以成功入到𨋢喇
*注意:迷路小女孩就算入到𨋢,都只會計0分*

 

電梯牌9張(雙面都可使用):

藍色面2人/4人遊戲時用,暗紫紅色3人遊戲時用

每張電梯牌都會有唔同數字,如果該牌有3種數字就代表係條隊入面排頭3嘅卡牌有分
而每個數字代表排第幾嘅玩家可以獲得幾多分


就好似呢張圖咁,第1部𨋢啡色男孩有2分,黃色女孩有3分

而每張電梯牌上方就有指定獲得雙倍分數嘅角色
如果入第1部𨋢嘅係媽媽/奶奶,就可以獲得雙倍分數

 

3個女人1個墟!?唔只女人㗎!


如果同1部𨋢有3個相同角色,就可以去飲咖啡喇!
用咗飲咖啡技能可以有1分添,順便仲可以攬炒其他玩家


例如紅色玩家見到同一部𨋢已經有2個爺爺,再使用爺爺(唔一定要用自己顏色嘅爺爺)

就可以垃埋前面2位爺爺去飲咖啡,咁佢就可以獲得1分喇

 

擺好個陣!準備搭𨋢!

(小編sss嘅扮工遊戲時間開始;P)


開局setting:放3張1個𨋢出嚟,因為3人局,所以會用暗紅色呢面

而第1局就用3張1號𨋢,第2局就用2號𨋢,如此類推(睇中間羅馬數字)


向每位玩家派發2張自己顏色嘅卡牌做手牌

然後將剩低嘅牌洗混,再抽出3隻放喺每部𨋢嘅頭位
(唔使唔同顏色,是但抽3隻就得)

抽牌後再剩低嘅牌大約平均分成3份,放喺𨋢前俾大家出牌後抽返

遊戲就可以正式開始~

 

遊戲開始!簡單嚟講!入到𨋢就有分!

開局抽牌時入到𨋢嘅人可以率先開始,然後順時針到下位玩家

記得每次都係先出1張牌,之後再抽返1張牌


啡色小女孩出現!但因為嗰部𨋢無其他啡色牌,所以發揮唔到佢拉人去後面嘅作用
而且就算佢排第3,都唔會拎到4分㗎!因為小女孩計0分

所以唯有打尖先可以迫小女孩出𨋢

而今次有人出咗黃色小女孩

就可以垃黃色媽媽去最後喇!


3個奶奶同時出現喺同一部𨋢!

出去飲咖啡啦!出最後1個奶奶嘅人可以拎走3張,然後獲得1分!

 

玩後感

本身以為係啲普通合家歡遊戲,原來要勝出遊戲除咗運氣,都需要消耗智力

因為要諗抽咩顏色嘅牌,之後用咩色嘅牌,出咩角色

可以選擇去自己主動拎分、又或者係拉人哋啲牌去後面陷害人,唔玩到最後都唔知邊個會贏

而且又唔會話玩得好大壓力,好似玩狼人殺之類咁爾虞我詐

無論2-4個人玩都好玩(感覺4人變數多啲好玩啲)係一個輕鬆又要小心機嘅有趣遊戲